- 779 -

1453. Okt. 30.

Vnsern fruntlichen grus zuuor. Erbern, weize, liebin frunde. Vns hat clagende vorbracht der ersame her Ffranciscus Woitstorff scolasticus vnde thumherre zu Breslow, wie her euch vnd ewir stat zu eren vnde gutte off ewir grosse fleissige bete in ewern grosten noten vorgereicht vnde awsgeczalt hette etczliche mergliche summe geldis, douor ir em etzliche czinse vnde jorrenthe hettet vorschreben vnde globet vnder der stat brieff vnde sigel alle jor gleich zu beczalin vff tage itczunder vorgangen vnde wol vnser gnediger herre bischoff vnd auch er selbis euch von sulchir czinse vnde beczalunge wegen wie offte hette geschrebin, mochte doch seyne gnade vnd her keyner antwort von euch bekomen, das em etzwas fremde neheme. Also hat er vns gebeten auch vor en zu schreiben etc., bitten wir mit besonderm fleisse, ir wellet dem erbern hern, so er als her meynet getrewlich kegin euch gefaren hat, seine czinse auch zu dancke awsrichten vnde beczalin, adir euch mit em in fruntschafften darumbe voreynen. Das wellin wir in besonderm fleisse alleczeit vordyenen vnd bitten hiruff ewir fruntliche vorschreben antwort. Gebin am dinstage vor Omnium sanctorum. Anno etc. LIII°.
Ratmanne der stat Breslow.

Mit Rückaufschrift an den liegnitzer Rath.

O. d. St. L. No. 424. Mit aufgedrücktem Siegel.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866